[poem] வாஸ்து

முகப்பில் உள்ள கருப்பு,
உரியோனுக்காகாதாம்.
விழிவலிக்கும் மஞ்சள் ஒன்றைத் தேர்வுசெய்தார்.

உள் பக்கத்து சுவரோவியங்கள்,
செல்வம் அழிக்குமாம்.
திருஷ்டி ஓவியங்கள் ஆங்காங்கே சிருஷ்டித்தார்.

தென்கிழக்கு மூலையில்
அஞ்சல் பெட்டி,
அழிவின் ஆரம்பமாம்.
தென்மேற்காய் நகர்த்தினார்.

தளத்தில் ஓடும் கோடுகள்,
தடைகள் கொண்டு சேர்க்குமாம்
செங்குத்தாய் கோடுகளிட்டுக் கட்டம் கட்டினார்.

இப்போதெல்லாம்...
என் இணைய தளத்திற்கு
தவறியும் யாரும் வருவதில்லை.

ஹவாயில் சூரியக்குளியல் எடுத்துக்கொண்டிருக்கிறார்
என் வாஸ்து ஜோசியர்.
ட்விட்டர் சொல்கிறது.